أبو العيال بيحب ع النت.. يا رجالة!

السلام عليكم.. في الحقيقة أنا عندي
مشكلة ومحتارة جداً حقيقي مش عارفة أنا صح ولّا غلط، ومحتاجة رأيكم.. أنا
كنت بحب واحد وهو كمان بيحبني، وبصراحة هو إنسان محترم وبيخاف عليّ بس
عنده عيب إنه دايماً شايف نفسه صح، وإني مش باعرف أفكر، وإنه دايماً اللي
بيوجهني، وحصلت بينا مشاكل كتيرة جداً جداً وعلى طول خناق، بس كل مرة كنا
بنرجع، وقال لي أكتر من مرة إنه هيبعد عني، بس برضه كنت أنا اللي ببدأ
بالصلح وأوقات كنت باغلط نفسي علشان بحبه، بس دلوقتي حاسة من كتر الخناق
إن قلبي بقى زي الطوبة مش عارف يحب، وبقيت خايفة جداً من الارتباط.






المهم في الوقت اللي كان الإنسان ده
بعيد عني بسبب الخناق، أنا اتعرّفت بإنسان تاني عن طريق النت واتعلّقت بيه
واتعلّق بيّ جداً جداً، وأكتر إنسان حسيت إنه فاهمني، وحس بكل اللي جوايا،
وهوّن عليّ في حاجات كتيرة جدا، وهو عايز ييجي ويتقدّم لي، بس للأسف هو
متجوّز وعنده طفلين بس جوازه ده ما كنش بإرادته يعني مجبر عليه، وهو مش
بيحب مراته وعايزني أنا أكون مراته، والله أنا نصحته كتير وفشلت، ويعلم
ربنا إني كنت باحاول أساعده بكل الطرق، بس فشلت إني أقرّبه من مراته.




هو اتعلّق بيّ جداً وشايفني كل حاجة
عنده أنا خايفة.. هل أنا كده باهدم أسرته؟!! مع العلم إنه بعيد عن مراته
ومش حاسين ولا بيقرّبوا من بعض وما بتهتمش بيه، وقال لي إن الحياة بينهم
مستحيلة، وكمان أنا حاسة إني باجرح الإنسان اللي حبيته!! بس هو للأسف
السبب في إنه وصّلني للحالة دي خلاني بجد كرهت الارتباط والجواز من كتر
خناقه وزعيقه فيّ وإهانته اللي بتجرح قلبي.. أرجوكم أفيدوني ولكم جزيل
الشكر.